काठमाडौँ – देशकै पुरानो वीर अस्पतालकाे व्यवस्थापनमा क्रान्तिकारी परिवर्तन भएकाे छ ।
अबदेखि बिरामीको टिकट लिनका लागि अस्पतालमा गएर लाइन बस्नुपर्ने समस्या हटेकाे छ । अस्पतालले टिकट वितरणमा डिजिटल सेवाको सुरुवात गरेको छ ।शुक्रबारदेखि अस्पतालले मोबाइल एप्लिकेसनमार्फत अनलाइन टिकट लिन सक्ने गरी सेवा विस्तार गरेको हो ।यो सेवा लिनको लागि बिरामीले मोबाइलको प्लेस्टोरबाट ‘वीर अस्पताल’ एप्लिकेसन डाउनलोड गर्नुपर्छ ।
अब घरबाटै टिकट काट्ने र आफूलाई आवश्यक पर्ने चिकित्सकसँग समय लिन सक्ने वीर अस्पतालका निमित्त प्रमुख प्रशासकीय अधिकारी डा. भूपेन्द्र बस्नेतले जानकारी दिए। डा. बस्नेतका अनुसार ई–सेवा वा खल्तीमार्फत टिकट शुल्क तिरेपछि बिरामीले अस्पतालको ओपीडीमा सेवा लिन सकिने छ।
अस्पतालले यसअघि नै ल्याब रिपोर्ट अनलाइनमार्फत नै हेर्न मिल्ने व्यवस्था गरेको डा. बस्नेतले जानकारी दिनुभयाे। वीर अस्पताललाई डिजिटलाइज गर्ने उद्देश्यले अनलाइनमार्फत सेवा सञ्चालन गरिएको डा. बस्नेतको भनाइ छ ।