सप्तरी, २९ चैत – सप्तरी जिल्लाका प्रहरी कर्मचारीलाई पीपीई (पर्सनल प्रोटेक्टिभ इक्विपमेन्ट) उपलब्ध गराइएको छ ।
विश्वभर तीव्र रुपमा फैलिरहेको कोभिड १९ को सङ्क्रमणबाट जोगाउन क्वारेन्टाइन स्थल, अस्पताल र गस्ती गाडीमा खटिएका प्रहरीलाई पीपीई उपलब्ध गराइएको सप्तरी प्रहरीले जनाएको छ ।
जनताको सुरक्षामा खटिने प्रहरी कर्मचारीको स्वास्थ्यमा पर्नसक्ने जोखिमलाई मध्यनजर गरी प्रत्येक प्रहरी कर्मचारीलाई दुई थान मास्क, १० जोर पञ्जा, एक-एक थान स्यानिटाइजर र चस्मासमेत प्रदान गरिएको छ ।
सर्वसाधारणलाई कोरोनाको उच्च जोखिमबाट सुरक्षित हुन र लकडाउन उल्लंघन नगर्न/नगराउन महामारीको जोखिमबाट जोगाउन विभिन्न १०० स्थानमा प्रहरीले माइकिङ, सामाजिक सञ्जाल र स्थानीय एफएममार्फत सन्देशमूलक सूचना तथा जनचेतनामूलक ‘जिङ्गल’ प्रचारप्रसार गरिरहेको प्रहरीले जनाएको छ । –रासस
