काठमाडौँ – सत्तारुढ गठबन्धनको उच्चस्तरीय राजनीतिक समन्वय समितिले संसदलाई सूचारु गराउन पहल गर्ने निर्णय गरेको छ ।
प्रधानमन्त्री निवास बालुवाटार शुक्रबार बसेको समिति बैठकले संसद् लामो समय अवरुद्ध हुनु उचित नभएको भन्दै संसद्लाई सुचारु गराउन पहल गर्ने निर्णय भएको सञ्चार मन्त्री ज्ञानेन्द्र बहादुर कार्कीले जानकारी दिए । संसदलाई बिनाअवरोध सञ्चालन गर्न सरकारको जतिकै प्रतिपक्षीको पनि कर्तव्य भएकोले सबै गम्भीर हुनुपर्ने उनले बताए ।
त्यस्तै बैठकले राष्ट्रियसभा निर्वाचनमा सत्ता गठबन्धनका उम्मेदवारहरूलाई जिताउन सातवटै प्रदेशमा गठन गरिएको संयन्त्रलाई प्रभावकारी रुपमा परिचालन गर्ने निर्णय भएको उनले बताए । माघ १२ गते हुने राष्ट्रियसभाको निर्वाचनमा केन्द्रित भएर बैठकमा छलफल भएको कार्कीले जानकारी दिए ।
पाँच दलीय सत्ता गठबन्धनबीच राष्ट्रियसभा निर्वाचनका लागि सिट बाँडफाँट भइसकेको छ । गठबन्धनले कांग्रेसलाई ६, नेकपा (माओवादी केन्द्र) र नेकपा (एकीकृत समाजवादी) लाई ५–५, जनता समाजवादी पार्टी ९जसपा०लाई २ र राष्ट्रिय जनमोर्चालाई एक सिट छुट्याउँदै उम्मेदवारी समेत दर्ता गरिसकेको छ ।
संघीय संसद्को माथिल्लो सदन राष्ट्रियसभाका रिक्त १९ सदस्यका लागि आगामी माघ १२ गते निर्वाचन हुँदै छ ।
